რას მოგცემს Google Business Profile, რასაც რეკლამა ვერ მოგცემს

წარმოიდგინე ადამიანი, რომელიც უცნობ უბანშია. მოშივდა, ტელეფონს იღებს და წერს: „კაფე ჩემთან ახლოს". რას ხედავს? Google მაშინვე უჩვენებს რუკას, რამდენიმე ადგილით, შეფასებებით, ფოტოებითა და მისამართით.

ეს ადამიანი არ ათვალიერებს რეკლამას. არ სქროლავს Instagram-ს. ის უკვე მზადაა, ფული ჯიბეშია და მხოლოდ ერთ რამეს ეძებს: სად წავიდეს ახლა.

ახლა მთავარი კითხვა: ამ სიაში შენი ბიზნესი ჩანს თუ არა? თუ არა, ჩათვალე ეს კლიენტი მეზობელთან შევიდა.

შემდეგ 3 წუთში გაჩვენებ, რას გაძლევს Google Business Profile, რასაც ვერც ერთი რეკლამა ვერ მოგცემს, და როგორ გამოიყენო ის სწორად.

ტაქსი, რომელიც აეროპორტთან დგას

წარმოიდგინე ორი ტაქსისტი. ერთი მთელი დღე ქალაქში ტრიალებს, ეძებს მგზავრს, ბენზინს წვავს და იმედოვნებს, რომ ვინმე ხელს დაუქნევს. მეორე უბრალოდ აეროპორტის გასასვლელთან დგას, სადაც ხალხი თვითმფრინავიდან გადმოდის: ჩემოდნებით და ერთი ნათელი მოთხოვნით. მათ ტაქსი ახლა სჭირდებათ.

რომელი ტაქსისტი მუშაობს ჭკვიანურად?

რეკლამა ხშირად პირველი ტაქსისტივითაა. ფულს ხარჯავ, რომ თვალში მოხვდე ადამიანს, რომელიც შენ ამ წუთას არც გეძებდა. Google Business Profile კი მეორე ტაქსისტია. ის ზუსტად იქ გაყენებს, სადაც კლიენტი უკვე გადმოვიდა და მზადაა.

რეკლამა ყურადღებას ეძებს. Google Business Profile კი იქ გხვდება, სადაც ყურადღება უკვე შენკენ არის მიმართული.

და ეს ყველაზე ცხელი კლიენტია, რომელიც კი არსებობს. ის, ვინც წერს „სანტექნიკოსი ჩემთან ახლოს" ან „კბილის ექიმი საბურთალოზე", ხვალ კი არა, დღეს ეძებს. და ამ გამოჩენაში ფულს არ იხდი: რეკლამისგან განსხვავებით, ყოველ ნახვაში არ გადაგახდევინებს.

შეიძლება იკითხო, რატომ არის ეს ასე მნიშვნელოვანი, თუ მაინც რეკლამა მაქვს? იმიტომ, რომ რეკლამა მაშინ ჩერდება, როცა ბიუჯეტი მთავრდება. Google Business Profile კი ფონზე მუშაობს დღე და ღამე, ისე, რომ ყოველ ნახვაში არ იხდი.

1. პროფილი, რომელიც თავად ყიდის შენ მაგივრად

ცხელი კლიენტი არ ნიშნავს ავტომატურ კლიენტს. როცა ის რუკაზე რამდენიმე ვარიანტს ხედავს, რჩება იქ, სადაც ყველაფერი ნათელია: სამუშაო საათები, მისამართი, ტელეფონი, ფოტოები და ის სერვისები, რასაც სთავაზობ.

ამიტომ შეავსე პროფილი ბოლომდე, არცერთი ველი ცარიელი არ დატოვო. დაამატე ნამდვილი ფოტოები შენი სივრცის, არა ინტერნეტიდან ჩამოტვირთული სურათები. სწორად მონიშნე კატეგორია, რომ Google მიხვდეს, რა ბიზნესი ხარ და ვის უჩვენოს შენი ბარათი.

ხშირად კლიენტი შენს საიტამდე საერთოდ არ მიდის. ის პირდაპირ ამ ბარათში იღებს გადაწყვეტილებას. ამიტომ ეს ბარათი ისე უნდა გამოიყურებოდეს, თითქოს თავად ყიდის შენ მაგივრად.

2. შეფასებები წყვეტენ, შენ აირჩევენ თუ მეზობელს

წარმოიდგინე, ორი ბიზნესი ერთმანეთის გვერდით დგას რუკაზე. ერთს აქვს 80 შეფასება და 4.8 ვარსკვლავი. მეორეს, ორი შეფასება. რომელს დაურეკავ?

შეფასებები სწორედ ის ადგილია, სადაც კლიენტი საბოლოოდ წყვეტს, შენ აირჩევს თუ მეზობელს. და ეს ის რამეა, რასაც რეკლამით ვერ იყიდი. შეფასებას მხოლოდ ნამდვილი, კმაყოფილი მომხმარებელი წერს.

ამიტომ თხოვე ყველა კმაყოფილ კლიენტს, დატოვოს შეფასება. გაუმარტივე ეს: გაუგზავნე პირდაპირი ბმული, რომ ორ წამში დაწეროს. და უპასუხე ყველა შეფასებას, კარგსაც და ცუდსაც, რადგან ამ პასუხს შემდეგი კლიენტიც კითხულობს.

დასკვნა

რეკლამა მაშინ მუშაობს, სანამ იხდი. Google Business Profile კი იქ გხვდება, სადაც კლიენტი უკვე მზადაა, და ამისთვის ყოველ ნახვაში ფულს არ ახარჯვინებ. ეს ის ადგილია, სადაც ცხელი კლიენტი თავად გეძებს.

ცხელ კლიენტს დარწმუნება არ სჭირდება. მას მხოლოდ შენი პოვნა სჭირდება.

ამიტომ გახსენი Google ახლავე და მოძებნე შენი ბიზნესი ისე, როგორც კლიენტი მოგძებნიდა. თუ ვერ პოულობ, ან ნახევრად შევსებულ პროფილს ხედავ, სწორედ აქ იკარგება ის ცხელი კლიენტი, რომელიც დღეს გეძებდა.

შემდეგ შეხვედრამდე,
რატი