რას უყურებს კლიენტი შენი ვებსაიტის პირველ 5 წამში

ქუჩაში მიდიხარ და მაღაზიის ვიტრინას ჩაუვლი. ერთი შეხედვა გყოფნის, რომ გადაწყვიტო, შეხვალ თუ გზას გააგრძელებ. არ კითხულობ ყველა ფასს, არ ითვლი თაროებზე დაწყობილ პროდუქტს. უბრალოდ გრძნობ: „ეს ჩემთვისაა" თუ „ეს ჩემთვის არ არის".

შენი ვებსაიტიც ზუსტად ასეთი ვიტრინაა. უბრალოდ ღიაა დღე და ღამე და მნახველის შეხედვა კიდევ უფრო ხანმოკლეა. ის წუთს არ გაძლევს. პირველ 5 წამში წყვეტს, დარჩება შენთან თუ დახურავს გვერდს.

შემდეგ 3 წუთში გაჩვენებ, რას უყურებს კლიენტი ამ პირველ 5 წამში და როგორ უნდა ჩააბარო ეს ტესტი.

პირველი 5 წამი ყველაფერს წყვეტს

როცა ვინმე შენს საიტს ხსნის, თავში სამ კითხვას სვამს, თითქმის წამში: სად მოვხვდი, ჩემთვისაა ეს და სწრაფად ვიპოვი თუ არა იმას, რაც მჭირდება. თუ გვერდი ამ კითხვებს მაშინვე არ უპასუხებს, ის მიდის.

აქ კი ბევრი საიტი აგებს. იმიტომ, რომ საკუთარ თავზე ლაპარაკობს და არა მნახველის პრობლემაზე. „კეთილი იყოს თქვენი მობრძანება", „ჩვენი კომპანია დაარსდა 2015 წელს", ლამაზი ფოტო და ბუნდოვანი ლოზუნგი. ამ დროს მნახველი ისევ ვერ ხვდება, შენ კონკრეტულად რას სთავაზობ და რატომ უნდა დარჩეს.

ვინც შენს საიტს ხსნის, მას საკუთარი პრობლემა უფრო აინტერესებს, ვიდრე შენი კომპანიის ისტორია.

შეიძლება იკითხო, რატომ მიდის ხალხი ასე სწრაფად? იმიტომ, რომ ერთ კლიკზე ასი სხვა საიტია. თუ შენთან პასუხს მალე ვერ პოულობს, უბრალოდ შემდეგზე გადადის. ეს არც სისასტიკეა და არც მოუთმენლობა, უბრალოდ ასე მუშაობს ინტერნეტი.

1. შეამოწმე, პასუხობს თუ არა პირველი ეკრანი მთავარ კითხვას

გახსენი შენი საიტი და შეხედე მხოლოდ იმას, რაც ჩასქროლვამდე ჩანს. ეს არის შენი ვიტრინა. ახლა წარმოიდგინე, რომ უცხო ადამიანი ხარ და პირველად ხედავ.

5 წამში ხვდები, ეს საიტი რას ყიდის და ვისთვისაა? თუ პასუხი „კი"-ა, ტესტი ჩააბარე. თუ პირველ ეკრანზე მხოლოდ ლოგო, დიდი ფოტო და სიტყვა „კეთილი იყოს თქვენი მობრძანება" ხვდება, მაშინ ვიტრინა ცარიელია.

კარგი პირველი ეკრანი მარტივად ამბობს სამ რამეს: რას აკეთებ, ვისთვის და რა უნდა გააკეთო შემდეგ. არც მეტი, არც ნაკლები.

2. გააკეთე შემდეგი ნაბიჯი აშკარა

როცა მნახველი მიხვდება, რომ სწორ ადგილას მოხვდა, მაშინვე უნდა დაინახოს, რა გააკეთოს შემდეგ. დარეკოს, მოგწეროს, შეუკვეთოს. ერთი მკაფიო ნაბიჯი.

ბევრი საიტი სწორედ აქ კარგავს კლიენტს. ტელეფონი სადღაც ბოლოშია მიმალული, ღილაკი არ ჩანს, ან პირიქით, ერთდროულად ათ რამეს გთავაზობს და მნახველი იბნევა. დაბნეული ადამიანი კი არ ყიდულობს, ის ხურავს გვერდს.

ამიტომ აჩვენე ერთი მთავარი მოქმედება და გააკეთე ის თვალშისაცემი. ერთი ნათელი ღილაკი ყოველთვის სჯობს ათ ბუნდოვან ბმულს.

დასკვნა

პირველი 5 წამი სილამაზეზე კი არა, სიცხადეზეა. ლამაზ საიტს, რომელიც აბნევს, კლიენტი არ რჩება. მარტივ საიტს კი, რომელიც მაშინვე პასუხობს, ენდობა.

ლამაზი საიტი, რომელიც აბნევს, აგებს. მარტივი, რომელიც მაშინვე პასუხობს, იგებს.

ამიტომ, სანამ შემდეგ ჯერზე საიტს გახსნი, ერთი წამით წარმოიდგინე, რომ პირველად ხედავ. რას მიხვდები პირველ 5 წამში?

შემდეგ შეხვედრამდე,
რატი