რატომ არის შენი კონკურენტი მუდამ წინ, თუ უკეთესი არ არის

ერთსა და იმავე საქმეს აკეთებთ. შენი ხარისხი უკეთესია, ფასიც უფრო სამართლიანი გაქვს და კლიენტს უფრო გულმოდგინედ ემსახურები.

და მაინც, ახალი კლიენტი მასთან მიდის. მისი კალენდარი სავსეა, შენ კი ზარს ელოდები.

ყველაზე შემაწუხებელი კი ის არის, რომ ეს შემთხვევითობა არ არის. თვიდან თვემდე მეორდება.

შემდეგ 3 წუთში გაჩვენებ, სად იგებს ის სინამდვილეში და რა ორი რამის გამოსწორება შეგიძლია უკვე ამ კვირაშივე.

ის ბურთს არ დაედევნება

ფეხბურთში ყოველთვის არის ერთი მოთამაშე, რომელიც თითქოს არსად ჩქარობს. სხვებზე მეტს არ დარბის და მოედანზე ყველაზე თვალშისაცემი არასდროსაა.

მატჩის ბოლოს კი სწორედ მან გაიტანა ორი გოლი.

საიდუმლო მარტივია: ის ბურთს არ დაედევნება. ის იქ დგას, სადაც ბურთი მოვა.

სწორედ ასეა შენი კონკურენტიც. შეიძლება იკითხო, რატომ ირჩევენ მას, თუ ხელობაში შენ სჯობხარ? იმიტომ, რომ კლიენტი შენს ხელობას ჯერ ვერ ხედავს. ის მხოლოდ იმას ხედავს, ვინც არჩევის მომენტში თვალწინ ჰყავს.

კლიენტი საუკეთესოს კი არა, იმას ირჩევს, ვისაც არჩევის წუთში ხედავს.

1. გაიგე, სად წყდება არჩევანი

არჩევანი შენს ოფისში არ კეთდება. ის მანამდე წყდება, სანამ ვინმე დაგირეკავს: Google-ის ძებნაში, Google Maps-ში, ან ჯგუფურ ჩატში, სადაც ვიღაც წერს „ვინ იცით კარგი ხელოსანი?".

ამიტომ გააკეთე ერთი მარტივი რამ. აიღე ტელეფონი, გახსენი Google ინკოგნიტო რეჟიმში და მოძებნე ის, რასაც შენი კლიენტი მოძებნიდა. არა შენი ბრენდის სახელი, არამედ სერვისი და ქალაქი ან უბანი.

ახლა კი გულწრფელად შეხედე პირველივე ეკრანს. ხარ იქ? თუ არა, ჩათვალე იმ არჩევანში საერთოდ არ მონაწილეობდი. კლიენტმა შენ არ დაგიწუნა, უბრალოდ ვერ დაგინახა.

და აი, სწორედ აქ იმალება ყველაზე ძვირი დანაკარგი: შენ საუკეთესო სამუშაოს აკეთებ, მაგრამ იმ წუთში, როცა ფული იხარჯება, ეკრანზე არ ჩანხარ.

კარგი, და თუ იქ არ ხარ, რა უნდა გააკეთო? დასაწყისისთვის მხოლოდ ორი რამ: ბოლომდე შეავსე შენი Google Business Profile (სერვისები, სამუშაო საათები, ნამდვილი ფოტოები) და სთხოვე კმაყოფილ კლიენტებს, დაწერონ შეფასება. Google Maps-ში სწორედ ეს ორი ამოგიყვანს ზემოთ ყველაზე სწრაფად და არც ერთი მათგანი ფულს არ გიჯდება.

2. მიეცი მიზეზი, რატომ სწორედ შენ

დავუშვათ, გამოჩნდი. კლიენტი შენს გვერდზეა და კითხულობს: „ხარისხი, გამოცდილება, საუკეთესო ფასი, ინდივიდუალური მიდგომა".

შემდეგ იმავეს კითხულობს კონკურენტის გვერდზე. მერე კიდევ ერთზე.

აი, მარტივი ტესტი, რომელიც ყველაფერს ცხადს ხდის: ჩასვი შენს ტექსტში კონკურენტის სახელი. თუ წინადადება მაინც მართალია, ეს წინადადება არაფერს ყიდის.

თუ იმავეს ყველა ამბობს, ჩათვალე არაფერი გითქვამს.

მიზეზი კონკრეტული უნდა იყოს და ისეთი, რომ კონკურენტმა ადვილად ვერ გაიმეოროს. მაგალითად: „ვპასუხობთ 15 წუთში, დღის ნებისმიერ დროს". ან „2-წლიანი გარანტია წერილობით". ან „მხოლოდ სააბაზანოებზე ვმუშაობთ, სხვას არაფერს ვაკეთებთ".

და ეს წინადადება ისეთ ადგილას უნდა იდგეს, სადაც პირველივე წამში დაინახავენ: საიტის თავში, Facebook-ის გვერდის აღწერაში, რეკლამის პირველივე სტრიქონში.

ერთი ასეთი წინადადება უფრო მეტს ყიდის, ვიდრე მთელი გვერდი ლამაზი სიტყვებისა.

დასკვნა

შენი კონკურენტი უფრო ნიჭიერი არ არის. ის ორ რამეს აკეთებს შენზე ადრე: ჩანს იქ, სადაც კლიენტი ირჩევს, და ერთი მკაფიო მიზეზით ხსნის, რატომ უნდა აირჩიონ სწორედ ის.

ორივე გამოსწორებადია და არც ერთი მოითხოვს დიდ ბიუჯეტს.

არ გჭირდება უფრო სწრაფად სირბილი. საკმარისია იქ იდგე, სადაც ბურთი მოდის.

შემდეგ შეხვედრამდე,
რატი