ერთი პატარა ცვლილება, რომელიც მაშინვე ზრდის შენი რეკლამის შედეგს

წარმოიდგინე, რომ Facebook-ს ასქროლავ. ერთი რეკლამა ასე იწყება: „ჩვენ ვართ კომპანია, 10 წელია ბაზარზე, გთავაზობთ მაღალი ხარისხის მომსახურებას". ჩასქროლე, არა?

მეორე რეკლამა კი ასე იწყება: „გადაიხადე რემონტში ფული და ერთ თვეში კედელი ისევ დაგინესტიანდა?" ამ წინადადებამ უკვე გაგაჩერა.

ორივე რეკლამამ შეიძლება ერთი და იგივე სერვისი გაყიდოს. მაგრამ ერთი მუშაობს, მეორე კი ფუჭად ხარჯავს ფულს. და მთელი სხვაობა მხოლოდ პირველ წინადადებაშია.

შემდეგ 3 წუთში გაჩვენებ ერთ პატარა ცვლილებას, რომელიც მაშინვე ზრდის შენი რეკლამის შედეგს: შენი რეკლამის პირველი წინადადება.

უცნობი წვეულებაზე

ჩათვალე, რომ წვეულებაზე ხარ. ერთი უცნობი მოგიახლოვდა და მაშინვე საკუთარ თავზე ალაპარაკდა: რა კომპანია აქვს, რამდენი წელია მუშაობს, რა პროდუქტი აქვს. შენ თავაზიანად აქნევ თავს და გასასვლელს ეძებ.

მერე მეორე უცნობი მოვიდა და გკითხა: „ეს პრობლემა შენც გაწუხებს, ხომ?" და უცებ მისი მოსმენა მოგინდა.

ზუსტად ასეა შენი რეკლამაც. ვინც რილსებს შორის სქროლავს, მას საკუთარი თავი უფრო აინტერესებს, ვიდრე შენ. თუ პირველივე წინადადება შენზეა და არა მასზე, ის უბრალოდ ჩაიქროლებს.

ადამიანი არ ჩერდება რეკლამაზე, რომელიც შენზე ლაპარაკობს. ის ჩერდება იმაზე, რომელიც მასზე ლაპარაკობს.

1. ჯერ შენი პირველი წინადადება შეამოწმე

გახსენი შენი ბოლო რეკლამა და მხოლოდ პირველი წინადადება წაიკითხე. ის იწყება სიტყვებით „ჩვენ", „ჩვენი კომპანია" თუ „გთავაზობთ"?

თუ კი, მაშინ პირველივე წამში შენზე ლაპარაკობ, მაშინ როცა კლიენტს საკუთარი პრობლემა აინტერესებს. სწორედ აქ კარგავ ყურადღებას, სანამ რეკლამა ნამდვილ საქმემდე მივა.

ეს ერთი წინადადება ყველაზე მნიშვნელოვან ფილტრად მუშაობს: ის წყვეტს, გააგრძელებს თუ არა ადამიანი კითხვას.

2. გადააქციე ის კლიენტის წინადადებად

ცვლილება მარტივია: შენზე ნათქვამი პირველი წინადადება ჩაანაცვლე იმ პრობლემით ან სურვილით, რომელიც კლიენტს აქვს.

აი, როგორ გამოიყურება ეს რეალურ პრაქტიკაში:

👉 ❌ „ჩვენ ვართ წამყვანი კომპანია ფანჯრების წარმოებაში"
✅ „ზამთარში ფანჯრებთან გცივა და გათბობის ანგარიში მაინც დიდი მოდის?"

👉 ❌ „გთავაზობთ პროფესიონალურ დასუფთავების სერვისს"
✅ „აღარ გრჩება დრო, რომ სახლი მოალაგო?"

ხედავ სხვაობას? პირველ ვარიანტში შენზე ლაპარაკობ. მეორეში პირდაპირ კლიენტის ცხოვრებაში შედიხარ და ის საკუთარ თავს ცნობს.

შეიძლება იკითხო, რატომ მუშაობს ეს ასე კარგად? იმიტომ, რომ ადამიანი მაშინ ჩერდება, როცა საკუთარ პრობლემას ხედავს, არა მაშინ, როცა შენს რეგალიებს კითხულობს.

დასკვნა

შენი რეკლამის პირველი წინადადება ის ადგილი არ არის, სადაც საკუთარ თავს წარადგენ. ის ერთადერთი შანსია, გააჩერო ის, ვინც უკვე სქროლავს.

არ დაიწყო იმით, ვინ ხარ შენ. დაიწყე იმით, რა აწუხებს მას.

ეს პატარა ცვლილებაა, დიდი ბიუჯეტი არ სჭირდება და დღესვე შეგიძლია გააკეთო. მაგრამ ხშირად სწორედ ის წყვეტს, შენი რეკლამა გაამართლებს თუ ფუჭად დაიხარჯება.

შემდეგ შეხვედრამდე,
რატი