რა ღირს რეკლამა ფეისბუქზე და რა ბიუჯეტით დაიწყო?

„რა ღირს რეკლამა ფეისბუქზე?"

ამ კითხვას თითქმის ყველა ბიზნესის მფლობელი სვამს და პასუხი ბევრს აკვირვებს: Facebook-ს ფასების სია არ აქვს. რეკლამა ონკანს ჰგავს. რამდენსაც მოუშვებ, იმდენი წყალი წავა და ნებისმიერ დროს შეგიძლია დაკეტო.

მაგრამ ონკანი ამბის მხოლოდ ნახევარია. თუ ვედროს ძირი გახვრეტილი აქვს, რაც არ უნდა მოუშვა, ბოლოს მაინც ცარიელი დაგხვდება.

შემდეგ 3 წუთში გაჩვენებ, რა ღირს რეკლამა ფეისბუქზე, რა ბიუჯეტით დაიწყო და როგორ არ დაღვარო ფული ნახვრეტიან ვედროში.

რა ღირს რეკლამა ფეისბუქზე?

რეკლამა ფეისბუქზე იმდენი ღირს, რამდენსაც შენ თავად დააყენებ. Meta-ს ფიქსირებული ფასი არ აქვს: Ads Manager-ში დღიურ ან მთლიან ბიუჯეტს ირჩევ, რეკლამის გაჩერება კი ნებისმიერ დროს შეგიძლია.

განსხვავება მარტივია. დღიური ბიუჯეტით ეუბნები Meta-ს, დაახლოებით რამდენი დახარჯოს ყოველ დღე. მთლიანი ბიუჯეტით კი მთელ პერიოდზე ერთ თანხას აყენებ, მაგალითად, ერთი თვის აქციისთვის, და Meta მას დღეებზე თავად ანაწილებს.

დღიურ ბიუჯეტს Meta-ს საკუთარი წესი აქვს. ზოგ დღეს შეიძლება შენს ბიუჯეტზე 75%-ით მეტი დახარჯოს, ზოგ დღეს ნაკლები, მაგრამ ერთ კვირაში (კვირიდან შაბათამდე) დღიური ბიუჯეტის 7-მაგს არასდროს გადააჭარბებს. ეს წესი Meta-ს ოფიციალურ გვერდზე დღიური ბიუჯეტის შესახებ წერია.

ვთქვათ, დღეში 30₾ დააყენე. ერთ დღეს ონკანიდან 52.5₾-მდე შეიძლება წავიდეს, მეორე დღეს 20₾, მაგრამ კვირის ბოლოს 210₾-ზე მეტი არ ჩამოგეჭრება.

რამდენი უნდა დავხარჯო რეკლამაზე დღეში ან თვეში?

ერთი სწორი ციფრი არ არსებობს. ბიუჯეტი ორ რამეზეა დამოკიდებული: რა მოგებას გიტოვებს ერთი კლიენტი და რა თანხის დახარჯვა შეგიძლია მთელი თვის განმავლობაში ისე, რომ არ ინერვიულო.

დაიწყე იმ თანხით, რომელსაც მთელი თვე შეინარჩუნებ, და არა იმით, რომელსაც მესამე დღეს შეშინებული გამორთავ. თვის ხარჯს მარტივად დაითვლი: დღიური ბიუჯეტი გაამრავლე დაახლოებით 30-ზე.

მერე უკუღმა დაითვალე. თუ ერთი კლიენტი, ვთქვათ, 200₾ მოგებას გიტოვებს, რეკლამა გაამართლებს მაშინაც კი, თუ ახალი კლიენტი 50₾ დაგიჯდება. ონკანს ნელ-ნელა უმატე: ჯერ ნახე, სად მიდის წყალი, მერე გაზარდე.

შეიძლება იკითხო, რატომ არ დავიწყო სულ პატარა თანხით, ვთქვათ, დღეში 3₾-ით. იმიტომ, რომ ასეთ რეკლამას იმდენად ცოტა ადამიანი ნახავს, რომ თვის ბოლოს ვერც იმას გაიგებ, მუშაობს თუ არა. წვეთ-წვეთად მოსული წყლით ვედროს ნახვრეტებს ვერც კი შეამჩნევ.

რატომ იხდის ზოგი ერთ მომართვაში ბევრად მეტს, ვიდრე სხვა?

იმიტომ, რომ ერთი მომართვის ფასს ბიუჯეტი კი არ წყვეტს, არამედ ის, რამდენი ადამიანი მოქმედებს რეკლამის ნახვის შემდეგ. ორი ბიზნესი შეიძლება ერთსა და იმავე თანხას ხარჯავდეს, მაგრამ ერთს ათი მომართვა მოუვიდეს, მეორეს კი ერთი.

ფული ჩვეულებრივ ოთხი ნახვრეტიდან იღვრება. პირველი: რეკლამა პირველივე 3 წამში ვერ აჩერებს ადამიანს, ის კი უბრალოდ ჩასქროლავს. მეორე: შეთავაზება ბუნდოვანია და ადამიანმა არ იცის, რას იღებს. მესამე: რეკლამას არასწორი ხალხი ხედავს.

და მეოთხე, ყველაზე მტკივნეული: ნელი პასუხი. (შაბათ საღამოს მოსული მესიჯი, რომელსაც ორშაბათს პასუხობ, უკვე კონკურენტთან წასული კლიენტია.)

კარგი ამბავი ისაა, რომ ოთხივე ნახვრეტის ამოვსება შენს ხელშია: უფრო მკაფიო პირველი კადრი, ერთი გასაგები შეთავაზება ფასით, სწორად შერჩეული აუდიტორია და პასუხი რამდენიმე წუთში და არა მეორე დღეს.

ბიუჯეტის გაზრდა ნახვრეტიან ვედროს ვერ გაავსებს. უბრალოდ, წყალი უფრო სწრაფად დაიღვრება.

ფულს Facebook-ს ვუხდი თუ სააგენტოს?

აქ ორი სხვადასხვა ხარჯია. პირველი რეკლამის ბიუჯეტია: ამ ფულს Meta შენი რეკლამის ჩვენებაში ხარჯავს და სარეკლამო ანგარიშზე მიბმული ბარათიდან ჭრის. მეორე სამუშაოს საფასურია, იმისთვის, ვინც რეკლამას აწყობს, ტესტავს და ყოველ კვირას ამოწმებს.

ონკანის ენაზე: წყლის ფასი ერთია, სანტექნიკოსის ხელფასი კი სხვა. ამიტომ, როცა სააგენტოს ესაუბრები, პირველივე შეხვედრაზე იკითხე: რეკლამის ბიუჯეტი ფასში შედის თუ ცალკე იხდი? ეს წინასწარ უნდა იცოდე, რომ ორი ციფრი ერთმანეთში არ აგერიოს.

რამდენ ხანში გავიგებ, მუშაობს თუ არა რეკლამა?

ჩვენთან, Concept Nile-ში, პირველი ცვლილებები ხშირად რამდენიმე კვირაშიც ჩანს, სტაბილურ შედეგს კი საშუალოდ 3 თვე სჭირდება. ზუსტი ვადა იმაზეა დამოკიდებული, რამდენად დიდია კონკურენცია შენს სფეროში.

პირველ კვირებში ლაიქებს ნუ დათვლი. დათვალე, რამდენმა ადამიანმა მოგწერა ან დაგირეკა. ვედროში ის წყალი ითვლება, რაც დარჩა, და არა ის, რაც გვერდზე გადაიღვარა. და ერთი-ორი დღის შედეგით ნუ განსჯი: ვედროს ავსებას დრო სჭირდება.

რა ღირს, თუ რეკლამას სააგენტო მართავს?

ჩვენთან, Concept Nile-ში, Facebook და Instagram რეკლამის მართვა თვეში 1350₾-დან იწყება. ეს მინიმალური პაკეტია: სარეკლამო ანგარიშის სრული მართვა, ბაზრის AI ანალიზი, სტრატეგია და შედეგების ყოველკვირეული შემოწმება, ფოტო-ვიდეო გადაღების გარეშე.

თუ კონტენტიც გჭირდება, 3600₾-იანი პაკეტი ამას ფოტო-ვიდეო გადაღებას, დიზაინს და ყოველკვირეულ პოსტებს უმატებს. 6390₾-იანი კი სრულ SMM-ს, Google SEO-სა და რეკლამას და ვებსაიტზე მუშაობასაც მოიცავს. თითოეულ პაკეტში რა შედის, აქ ნახავ: SMM და Meta რეკლამის პაკეტები და ფასები.

ჩაკეტილი ხელშეკრულება არ არის: თუ შეწყვეტა მოგინდება, ნებისმიერ დროს შეგიძლია. ანუ ვიღაც ონკანსაც უყურებს და ვედროს ნახვრეტებსაც ამოწმებს ყოველ კვირას, შენ კი შენს საქმეს აკეთებ.

დასკვნა

რეკლამა ფეისბუქზე იმდენი ღირს, რამდენსაც შენ მოუშვებ ონკანიდან. მაგრამ ნამდვილი კითხვა სხვაა: რა გიჯდება ერთი კლიენტი?

დაიწყე იმ ბიუჯეტით, რომელსაც მთელი თვე შეინარჩუნებ. ჯერ ნახვრეტები ამოავსე: მკაფიო რეკლამა, გასაგები შეთავაზება, სწორი ხალხი და სწრაფი პასუხი. და მხოლოდ ამის შემდეგ მოუმატე ონკანს.

ბიუჯეტი ონკანია. შედეგს კი ვედრო წყვეტს.

შემდეგ შეხვედრამდე,
რატი