რატომ ხდები უხილავი ფეისბუქის ალგორითმისთვის

წარმოიდგინე: ყოველ კვირას პოსტავ. დროს ხარჯავ, ტექსტს არჩევ, სურათს არჩევ. აჭერ „გამოქვეყნებას" და... სიჩუმე. ორი მოწონება, ისიც ნაცნობებისგან. გგონია, ფეისბუქმა რაღაცის გამო დაგსაჯა.

სიმართლე ისაა, რომ ფეისბუქს შენ არც „უყვარხარ" და არც „სძულხარ". მას სულ სხვა საქმე აქვს.

შემდეგ 3 წუთში გაჩვენებ, რატომ ხდები უხილავი ალგორითმისთვის და როგორ დაიბრუნო დარბაზი უკან.

ალგორითმი DJ-ია, არა მოსამართლე

წარმოიდგინე უზარმაზარი წვეულება. ფეისბუქი იქ DJ-ია. შენი ყოველი პოსტი კი ერთი ტრეკია, რომლის დაკვრასაც სთხოვ.

DJ სულელი არ არის. ის ახალ ტრეკს მთელ დარბაზს ერთბაშად არ ასმენს. ჯერ პატარა ჯგუფს უშვებს, კუთხეში მდგომ ორმოცდაათ ადამიანს, და უყურებს: რა ხდება?

თუ ეს ხალხი გაჩერდა და რიტმს აჰყვა, DJ ხმას უწევს და იმავე ტრეკს მთელ დარბაზს უშვებს. თუ დარბაზი დაცარიელდა, ყველა ისევ ტელეფონს დაუბრუნდა, DJ ჩუმად ცვლის ტრეკს. შენი პოსტი კი ქრება.

უხილავი მაშინ ხდები, როცა პირველივე პატარა ჯგუფი ტელეფონს უბრუნდება.

ესეიგი ფეისბუქმა შენ არ დაგსაჯა. უბრალოდ, პირველ ჯგუფს რეაქცია არ ჰქონია და DJ-მ დაასკვნა, რომ ეს ტრეკი დარბაზს არ უნდა.

1. ჩააბარე პირველი წუთის ტესტი

რაკი ყველაფერს პირველი პატარა ჯგუფის რეაქცია წყვეტს, შენი პოსტის მთავარი საქმეა, სწორედ ეს ხალხი გააჩეროს.

სანამ „გამოქვეყნებას" დააჭერ, ერთი კითხვა დაუსვი საკუთარ თავს: „ამ პოსტს პირველი ადამიანი გააჩერებს და მოიწონებს, თუ ჩააქროლებს?" თუ პასუხი „ჩააქროლებს"-ია, პოსტი ჯერ არ ვარგა.

მშრალ გასაყიდ პოსტს, ტიპის „ჩვენთან არის ფასდაკლება, დაგვირეკეთ", რეაქცია არავის აქვს. სამაგიეროდ, კითხვა, მკაფიო აზრი, პატარა რჩევა ან რეალური ისტორია ხალხს აჩერებს. ეს ის ტრეკია, რომელსაც დარბაზი აჰყვება.

2. აქციე პოსტი საუბრად, არა განცხადებად

DJ-ს ერთი რამ აინტერესებს: ხალხი რჩება დარბაზში თუ არა. ფეისბუქსაც: ადამიანები ჩერდებიან, წერენ კომენტარს, აზიარებენ და ინახავენ თუ არა.

ამიტომ ერთი მშრალი მოწონება ბევრად ნაკლებს ნიშნავს, ვიდრე ერთი კომენტარი ან გაზიარება. კომენტარი DJ-სთვის ნიშანია, რომ დარბაზი ცოცხალია.

მოწონება ტაშია. კომენტარი და გაზიარება კი სავსე დარბაზი.

ამიტომ დაასრულე პოსტი რეალური კითხვით, რომელსაც ადამიანი პასუხს გასცემს. და როცა კომენტარს მოგწერენ, პირველ საათშივე უპასუხე. ყოველი პასუხი DJ-ს ეუბნება: „ტრეკი გააგრძელე, დარბაზი ცეკვავს".

დასკვნა

ფეისბუქი შენი მტერი არ არის. ის უბრალოდ ფილტრია, რომელიც ხალხს იმას აჩვენებს, რაზეც ხალხივე რეაგირებს.

ალგორითმს არ სჭირდება მოტყუება. მას სჭირდება პოსტი, რომელსაც დარბაზი აჰყვება.

ამიტომ, შემდეგ პოსტამდე, ნუ იფიქრებ „როგორ დავამარცხო ალგორითმი". იფიქრე „როგორ გავაჩერო პირველი ადამიანი". დანარჩენს თავად DJ გააკეთებს.

შემდეგ შეხვედრამდე,
რატი